塞内加尔唔易食 英格兰半和睇准出击

　上届世盃殿军英格兰16强恶斗塞内加尔。英格兰分组赛表现愈嚟愈似样，最重要系後防够稳固，呢点喺淘汰赛非常重要，预料修夫基仍会采取较保守嘅战术，尤其对住步大力雄嘅非洲兵，半场唔会轻举妄动，免得畀对方偷鸡成功，佢哋近3次世盃对非洲球队全开半和，值得再追。 　　「三狮兵团」喺最後一场分组赛，起用部分副选，仍能以3比0轻取威尔斯，分组赛2胜1和，值得留意嘅系，除咗首战对伊朗早早领先4球，於比赛後段稍为放松失咗2球，近2场均保持不失。 　　英军有经验识玩淘汰赛 　　哈利马古尼一洗喺曼联沦落副选，及上阵经常梦游球场嘅恶习，喺英格兰一夫当关，仲助攻助守，以佢为首嘅防线，确实畀人好大信心。领队修夫基坚持用佢终於得到回报。去到淘汰赛阶段，防守稳定方面非常重要，而且英军旧年欧国盃杀入决赛，基本班底都系呢班人，有晒经验识得点样应付淘汰赛踢法同压力。 　　塞内加尔首战不敌荷兰後，连胜两场取得16强资格，球员们步大力雄，喺上半场体力充沛时，对弱旅可以取得入球，对劲旅如荷兰则可以保持均势，预料佢哋今场对英格兰嘅比赛，上半场都会系一场体力嘅较量。不过英军绝大部分球员效力英超，习惯高压快速踢法，唔会畀塞内加尔太多空间，相信上半场会陷入拉锯，半场和值捧。